Алматы. 25 қараша. ҚазТАГ – Қазақстанның бірқатар өңірінде қылмыстық-атқару жүйесі (ҚАЖ) мекемелерінде 10 радикалды діни идеология жақтасының әрекетінің жолы кесілді, деп хабарлады ұлттық қауіпсіздік комитетінің баспасөз қызметінен.
«Осы жылғы 22 қарашада Ұлттық қауіпсіздік комитеті ІІМ-мен бірлесе, Алматы облысы прокуратурасының үйлестіруімен Алматы, Қостанай және Жетісу облыстарының қылмыстық-атқару жүйесі мекемелерінде 10 радикалды діни идеология жақтасының әрекетінің жолын кесті», - делінген хабарда.
Хабарда атап өтілгендей, алдын ала мәліметке сәйкес, фигуранттардың бірі қамау жағдайында террорлық акт жасауға дайындалған, ал қалғандары терроризмді насихаттауға қатысып, террорлық әрекеттерді ұйымдастыру мақсатында адамдарды өз қатарларына тартумен айналысқан.
Жаза өтеу орындарында жүргізілген тінтулер барысында суық қару, смартфондар және басқа да заттай дәлелдер алынды.
Біреуінің экстремизм үшін соттылығы бар. Қалғандары кісі өлтіру, тонау және ұрлық үшін жазаларын өтеген.
«Сондай-ақ, Алматы қаласында пробациялық бақылауда тұрған олардың байланысы ұсталды», - делінген хабарда.
Көрсетілген адамдарға қатысты Қылмыстық кодекстің 255, 256 және 259-баптары бойынша сотқа дейінгі тергеп-тексеру жүргізілуде. Қылмыстық-процестік кодекстің 201-бабының 1-бөлігіне сәйкес өзге ақпарат жария етуге жатпайды.
Қазақстанның бірқатар өңірінде ҚАЖ мекемелерінде радикалды діни идеология жақтасы әрекетінің жолы кесілді
