Ақмола облысында есірткі зертханасы анықталды, үш қазақстандық пен бір шетелдік ұсталды

Күні: 12:56, 13-08-2020.

Астана. 13 тамыз. ҚазТАГ – Ақмола облысында есірткі зертханасы анықталды, деп хабарлады Қазақстанның ұлттық қауіпсіздік комитетінің (ҰҚК) баспасөз қызметінен.
«2020 жылғы 30-31 шілдеде ҚР ҰҚК Нұр-Сұлтан қаласы бойынша департаменті Экономикалық тергеу департаментімен және ҚР ІІМ Ұлттық ұланының «Бүркіт» арнайы мақсаттағы бөлімшесімен бірлесіп жүргізген арнайы операция нәтижесінде Қазақстан Республикасының үш азаматы мен бір шетелдікті ұстады.
Күдіктілердің Ақмола облысының аумағында кейіннен Нұр-Сұлтан қаласында таратылған психотроптық заттарды өндіретін жасырын зертхана ұйымдастыруға және оның жұмыс істеуіне қатысы бар», - делінген бейсенбіде таратылған хабарда.
Есірткіні сату осы мақсатта құрылған Интернет желісінің «Deep Web, Darknet» көлеңкелі сегментінің платформасында «қойылма» деп аталатын жолмен жүзеге асырылған.
«Тінту барысында есірткі мен психотроптық заттар, сондай-ақ оларды жасау кезінде қолданылатын химиялық реагенттер мен жабдық табылды.
Ұсталған адамдар ҚР ҰҚК тергеу изоляторына қамалды. Сотқа дейінгі тергеп-тексеру жалғасуда», - делінген хабарда.


Жаңалықтармен бөлісу: