ҚР Денсаулық сақтаумині Ақтөбедегі мектеп оқушыларын БЦЖ вакцинасымен қайта вакцинациялау фактісі бойынша тексеруді бастады

Күні: 09:19, 29-09-2022.

Ақтөбе. 29 қыркүйек. ҚазТАГ – ҚР Денсаулық сақтау министрлігі Ақтөбедегі мектеп оқушыларын туберкулезге қарсы қайта вакцинациялау фактісі бойынша қызметтік тексеру тағайындады, деп хабарлады ведомствоның баспасөз қызметінен.
«ҚР Денсаулық сақтау министрлігі Ақтөбедегі мектеп оқушыларын Манту сынамасын жүргізбей БЦЖ вакцинасымен қайта вакцинациялау фактісі бойынша қызметтік тексеруді бастады. Қазіргі уақытта бұл инцидент бойынша құрамында Денсаулық сақтау министрлігінің бейінді Санитариялық-эпидемиологиялық бақылау және Медициналық және фармацевтикалық бақылау комитеттерінің басшылары, бейінді мамандары бар Комиссия құрылды, олар эпидемиологиялық тексеру жүргізіп, сараптамалық қорытындының негізінде болған инцидентке баға береді», - делінген сәрсенбіде таратылған хабарда.
Ведомствода мәлімдегендей, Ақтөбе облысының денсаулық сақтау басқармасы ата-аналармен түсіндіру жұмыстарын жүргізіп, балалардың денсаулық жағдайына тұрақты мониторинг жүргізуде.
«Ағымдағы жылғы 13 қыркүйекте Ақтөбе қаласының №74 жалпы білім беретін орта мектебінде туберкулиндік диагностикаға жататын бірінші сынып оқушыларына Манту сынамасын жүргізбей БЦЖ вакцинасымен қайта вакцинациялау фактісі орын алды.
Мектеп бойынша профилактикалық екпелерді жүргізу үшін жауапты орындаушылар ретінде Ақтөбе қаласындағы жеке клиниканың («Медикус орталығы» ЖШС ) дәрігері мен мейіргері тағайындалды. Аталған медицина қызметкерлері бүгінде жұмыстан шеттетілді. Балалардың жалпы жағдайы қанағаттанарлық, барлығы педиатрлардың бақылауымен сабақтарын жалғастыруда», - деп мәлімдеді денсаулықмині.


Жаңалықтармен бөлісу: